Sot, Komandanti i KFOR-it, gjeneralmajor Özkan Ulutaş, priti në takim kryeministrin në detyrë, Albin Kurtin në Kampin Film City, në Prishtinë.

Kurti në takim ishte i shoqëruar nga dy ministra, Ejup Maqedonci dhe Elbert Krasniqi, shkruan Arbresh.info.

KFOR-i njofton se ata shkëmbyen mendime mbi forcimin e bashkëpunimit ndërmjet KFOR-it dhe institucioneve të Kosovës.

Gjeneral Ulutaş theksoi përkushtimin e palëkundur të KFOR-it për të vazhduar kontributin në sigurinë në mbarë Kosovën dhe rajonin më të gjerë.

“KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt dhe të qëndrueshëm për të gjithë njerëzit dhe komunitetet që jetojnë në Kosovë, si dhe në lirinë e lëvizjes, në çdo kohë dhe në mënyrë të paanshme. KFOR-i punon në koordinim të ngushtë me Policinë e Kosovës dhe Misionin e BE-së për Sundimin e Ligjit në Kosovë (EULEX), secili në rolin e vet si reagues të sigurisë”, thuhet në njoftim./Arbresh.info